En 1985, Bieito Ledo decide crear unha editora que produza obras innovadoras na nosa lingua e contribúa a estendela e a consolidala como lingua de prestixio na sociedade. Con ese propósito, o 14 de novembro nace Ir Indo Edicións na cidade de Vigo.

Nun principio a súa intención será difundir obras de referencia, obras prácticas e rigorosas, imprescindibles para consolidar o correcto uso dunda lingua que aínda non estaba normalizada. O seu periplo comercial comeza, pois, co lanzamento ao mercado do Diccionario da Lingua Galega en tres formatos: o máis completo en 3 tomos, o Práctico e o Diccionario Escolar, de pequeno formato, e que hoxe vai pola súa terceira edición.

Ir Indo axiña adquire sona gracias a estas obras, e pouco máis tarde, decide abrir novos camiños editoriais. Nace entón a colección Narrativa, na que publicarán autores como Francisco Fernández del Riego, Darío Xohán Cabana, Alfredo Conde ou Moncho Borrajo. Hoxe a colección conta con 45 títulos, a maioría deles orixinais en galego, e outros que son traducións á nosa lingua de escritores foráneos como Poe, Lovecraft, Tolstoi, Conrad ou Roald Dahl, traducións que en outubro de 2002 deron lugar á colección Clásicos Ir Indo.

As imaxes, as linguas, os soños
Pioneira nos libros de imaxe, un dos grandes acertos da editorial foi o camiño aberto coa colección Cidades de Galicia, composta por obras de gran formato con textos en galego, inglés, francés e español, e que constitúen auténticas guías de luxo das principais cidades do noso país. Son libros feitos cun coidado exquisito, encargados a figuras ilustres da nosa literatura (Camilo José Cela, Méndez Ferrín, Filgueira Valverde ou Torrente Ballester) e cun peso importante da imaxe, ás veces reproducindo en verdadeiras reportaxes fotográficas un ciclo anual completo na cidade retratada. No apartado visual da colección, resaltan artistas e profesionais do eido visual como Laxeiro, X. L. Suárez Canal, Vítor Vaqueiro ou M. G. Vicente. Centrándose xa fóra das grandes urbes, a editorial decidiu continuar empregando esta liña de obras de gran formato para abordar a descrición das principais vilas de Galicia, tanto dende o plano literario (sempre da man dun autor coñecedor ao máximo da cidade retratada) como dende o visual (un fotógrafo que capte as imaxes máis características da zona). Con este obxectivo creouse a colección As Vilas, onde podemos atopar poboacións como Soutomaior, Celanova, Allariz, Baiona, Ribadavia ou Vilalba.

Crecendo cos nenos
Pouco a pouco, a editorial vai diversificando as súas liñas de traballo. Deseguido xorden coleccións infantís como O Parrulo, destinada aos primeiros lectores e unha das máis exitosas. Comeza a traballar tamén en libros de texto. Créase entón o método de lecto-escritura "Chirlo Merlo", que se compón de libros de lectura, fichas prácticas, cadernos de grafomotricidade, cadernos de pautas..., e que será moi empregado polos mestres a nivel de toda Galicia. Xa en 1998, aparece a colección Festas na Escola (composta por monográficos sobre as festas tradicionais galegas onde se expoñen gran cantidade de actividades escolares postas en práctica polo grupo de profesores que asinan as obras), e unha nova colección infantil e xuvenil, O Elefante Contacontos, baixo a que se publican obras literarias breves adaptadas a tres franxas de idade diferentes: para rapaces de máis de cinco anos, máis de oito e máis de catorce.

A fondo, co ensino
O mundo escolar seguiu sendo obxecto de interese por parte da editorial ao creárense as coleccións Raigame e A Fraga, encamiñadas, máis que nada, ao profesorado e á consulta en bibliotecas, xa que cada obra é unha análise especializada, un ensaio que xira arredor dun só tema buscando as súas claves con rigor científico. En Raigame a temática común a todos os títulos será a etnografía e a cultura popular galega, e en A Fraga o ensaio e a investigación sobre temas tan diversos como o Parlamento galego, a autoestima e a aprendizaxe, a filosofía da ciencia ou a memoria dos presos do 36 na illa de San Simón.

Nunha época na que se carecía de biografías de moitas personalidades importantes do mundo social e cultural de Galicia, a colección Galegos na Historia procurou achegar a calquera tipo de lector as vidas de máis de dez figuras imprescindibles da nosa historia recente. Castelao, Antonio Fraguas, Rafael Dieste, Milladoiro ou Eugenio Granell son imaxes de portada nunha colección que facilita dende os máis pequenos detalles persoais ata os últimos feitos da vida pública de cada personaxe investigado, sempre dende o coñecemento e o respecto cara aos protagonistas.

Coñecer o entorno, amar o país
Por outra parte, a vella arela da comarcalización de Galicia, desexada xa no Estatuto de Autonomía do 36, animou aos responsables da editorial a afondar no coñecemento das diversas comarcas galegas coa serie de guías informativas Galicia a Fondo. Nas primeiras guías descríbense e analízanse as nosas comarcas naturais, e logo de establecerse a Lei de Desenvolvemento Comarcal do 96, a colección continúa afondando nas divisións administrativas establecidas nese texto legal. Xa a finais do ano 98 decídese continuar empregando o formato cómodo e áxil das guías para informar sobre viaxes e natureza, dúas liñas editoriais recentes, caracterizadas pola gran cantidade de fotografías que conteñen e o seu formato práctico á hora de saír ao campo a coñecer o medio ou a percorrer outras cidades e vilas europeas.

Dende a súa creación, Ir Indo procurou encher sempre os baleiros editoriais que existían na nosa cultura. Hoxe pensamos que o obxectivo está máis que cumprido coa aparición da Enciclopedia Galega Universal, unha obra cumio coa que pretendemos dotar á lingua galega dun instrumento de traballo imprescindible e axeitado ás súas necesidades, moderno e rigoroso, útil e completo. Unha obra coa que, en palabras do editor Bieito Ledo, "a cultura galega se viste de longo".